फोटो : सुधीर कुमार
सिबौ हंसुलि बिचारिक ग्रहौ खराब भोय, ईज बाबू लि ब्या करौ मस्त दैज ले दे आब जदुक उनरि हैस्यत छी वीहैबेर बाकिकरौ. तौ ब्या ले ठगिबेर भो बल. कम्पनी में छ कूनेर भै ब्या बखत, पछिल चांछा के नै निकल. दिल्लीपन छी बल कथप. शराब पीनेर भये सुदै आम जस चूसनेर भै पऊ. पीबेर मारन हाडन ले करछी बल.
(Kumaoni Short Story Vinod Pant)
एक बार मैत ले ऐगेछी, आब मैत ले कब तक रवै खावै हूंछी? फिर ईज-बाबू लि समझै बुझैबेर दुल्हौ क दगाड़ भेजी. लिजाण बखत कूणय बल रनकौर आज बटी नि पीं. कसम हसम ले खाईन. पर उज्याड़ि बल्दै लि कबै उज्याड़ खांण छौडै? सौरास जांईयाक तीन-चार म्हैण बाद आजि उसै. वी हाल. मैत क दिई सब जेवर बेचि दे रनकारैलि. बिचारि हात् एक पिरूलै मुनडी ले नि रूण दी. के कूण पर बौई जानेर भै. खा्प कुखा्प कूंण निकूण सब कूनेर भै. कदुकै दिन लंगंण ले ठेली बिचारिलि.
जब नान् बैंणी ब्या दिन मैत आई भै तो बिचारि क आंग में मा्ंस क रत्ति नि भै, सिबौ हाडै-हाड़ देखी रई भाय. आंगूं काटला तो ल्वे तोप ले नि निकल तसि हालत हई भै. तासै रंग न में बिचारिलि कारबार ले करी भै. द्वि नानतिन ले भईन बिचारि बटी. दूसर भौ हुण बखत तो मरी-मरी बचीं बिचारि.
फिर एक दिन दूल्हौ ले जानै रौ, पीलीया भो बल, पीलीया में ले शराब पींण नि छाडि हैगे कि हूंछी. दूल्हौ मरी बाद सासू लि नरूण करि दी, बार-बार वीकैणी दोछूण दिनेर भै, म्यार च्याल कैं खै गे, असकुनी ऐ म्यार घर मे तौ कूनेर भै. सौरज्यू जै जरा भाल आदिम छी बल. नानतिन के के हूंछी? बिन बाबू क हैग्याय, च्योल तो बीडि ले सिखि गोछी बल. जरा चेली जै सहार भै, कबै घा काटण, कबै गुबर निकालण, ओखल कूटण बखत छिटण बटोवण करि दिनेर भै. च्योल बिगडि गो कैबेर उकें माम् नाक दगाड़ अलमाड़ भेजौ. वां जैबेर जै जरा सुधरौ.
(Kumaoni Short Story Vinod Pant)
जब तक सौरज्यू छी उनरि पिनसिनैलि दर गुजर चलनेर भै पछिल सौरज्यू मरी बाद उ ले बन्द हैगे. सास् एक लाल पाई नि देखूनेर भै. मैसनक बौल करि करि बेर बखत काट्.
समयक फेर भै, उ कूनन नै भगवान बारै बाट् नि मारन कैबेर, आज देखो च्योल ले पी डब्लू डी मे लागि गो, चेलि बीएससी करनै बल. को कूंछी तैक च्योल सुधरौल कैबेर? आब्बै च्यालक ब्या ह्या करैलि तो तैक दगड़ हैजाल और सुपत्ति ले ऐ जालि बिचारि कैं.
कदुकै कष्ट सहन तैलि पर एक बात छ कबै तैलि कैकै नक नि कर और नक नि चाय, कबै कैकी निद्र नि करि. दौ द्याप्तन ले खूब मानछी कति एक ढूंग ले ठाड़ देखनेर भै तो उत्ती मुनिटोप दी दिनेर भै. पैं भगवानैलि ले चा शैद तैक उज्याणि. भल करियक भलै हुनेर भै. भगवान ले परीक्षा ल्हिनन शैद मनखी कि. जनमभरि कष्ट करि बाद आब सुपत्ति ऐरै, आब चारै दिन सही सन्तोषलि खालि बिचारि.
(Kumaoni Short Story Vinod Pant)
वर्तमान में हरिद्वार में रहने वाले विनोद पन्त ,मूल रूप से खंतोली गांव के रहने वाले हैं. विनोद पन्त उन चुनिन्दा लेखकों में हैं जो आज भी कुमाऊनी भाषा में निरंतर लिख रहे हैं. उनकी कवितायें और व्यंग्य पाठकों द्वारा खूब पसंद किये जाते हैं. हमें आशा है की उनकी रचनाएं हम नियमित छाप सकेंगे.
इसे भी पढ़ें: विरासत है ‘खन्तोली गांव’ की समृद्ध होली परम्परा
काफल ट्री वाट्सएप ग्रुप से जुड़ने के लिये यहाँ क्लिक करें: वाट्सएप काफल ट्री
काफल ट्री की आर्थिक सहायता के लिये यहाँ क्लिक करें
पहाड़ के एक छोटे-से गाँव में एक पिता रहता था. उम्र अब ढलने लगी थी,…
सांस्कृतिक परम्परा की दृष्टि से उत्तराखण्ड एक समृद्ध राज्य है. समय-समय पर यहां के कई…
जाने-माने पत्रकार, साहित्यकार और फिल्म निर्देशक विनोद कापड़ी से कल शाम मुलाकात हुई. दरअसल,उनके निर्देशन में…
उत्तराखंड की सांस्कृतिक राजधानी अल्मोड़ा के मुख्य आकर्षण में से एक रामलीला का मंचन इन…
लोग इसे पहाड़ और पलायन की कहानी की तरह देखेंगे. लोग इसे खंडहर होते जा…
पिछली कड़ी : सागर से शिखर तक : स्वामी मन्मथन संघर्षनामा का ये किस्सा आजादी…
View Comments
आपके माध्यम से विनोद जी की कहानी पड़ी कहानी दमदार है काफी अच्छा साहित्य पुट है।
टिप्पणी कर्ता खीम सिंह रावत हल्द्वानी से।।
आपके माध्यम से भेजी गई विनोद जी की कहानी पड़ी कहानी दमदार है और इसमें साहित्यिक पुट है।।0